‘നിദ്ര’ (കവിത).

തിരുവണ്ണൂർ രാജശ്രീ (Street Light fb group).

ഇരുട്ടിന്നഗാധ കാളിമയാണിവിടെ.
ഇതിലൊരു കറുത്ത പൊട്ടായലിയണം.

മഞ്ഞിന്നതിശെെത്യമാണിവിടെ മരവിച്ചൊരാലിപ്പഴമായ് പൊഴിയണം.

നിത്യനിശബ്ദമീ ശൂന്യഭൂമിക
നിലക്കുമെന്‍ ശോകരാഗഗീതിക.

ആശതന്‍ തിരമാലയാര്‍ത്തിടില്ലാ
അതിശാന്തമീ ശ്യാമസാഗരം !

ചിന്തതന്‍ ചുഴികളില്ലാത്തൊരീ കടലില്‍
ചിന്നണമൊരു നീര്‍ക്കുമിളയായി !

നിസ്സാരയായി ഞാന്‍ മറഞ്ഞീടിലും
നിന്നോര്‍മയില്‍ താരമായി മിന്നണം.

സ്വപ്നങ്ങളില്ലാതെ സ്വസ്ഥയായ്
സര്‍വ്വവും മറന്നൊരു സുഷുപ്തി നേടിടും.

അര്‍ക്കനുമാവില്ലിനിയുണര്‍ത്തിടാന്‍
അതിഗാഢം സുഖമായുറങ്ങിടും ഞാന്‍.
____________________________
ഭൂമിക=പ്രദേശം
ഗീതിക=ചെറിയഗാനം
ശ്യാമസാഗരം =കറുത്ത (മനോഹരമായ )കടല്‍
സുഷുപ്തി=ഉറക്കം