സജി കുളത്തുപ്പുഴ. (Street Light fb group)
ഇമ്പോർട്ടഡ് കുഷ്യനിൽ… കാലിന്മേൽ കാൽകയറ്റി വച്ച് ദൈവത്തിന്റെ അവതാരത്തെ പൊലെ ഇരിക്കുകയാണ്….”കഥയില്ലാത്ത ജീവിതം” എന്ന ടി.വി പ്രോഗ്രാമിന്റെ അവതാരക ബാലാമണി…!
അവരുടെ ചോദ്യങ്ങൾക്ക് മുന്നിൽ മുഖം കുനിച്ചിരുന്നതല്ലാതെ….ഒന്നിനും മറുപടി പറഞ്ഞില്ല ഹരിനാരായണൻ…!
തന്റെ മുൻ ഭാര്യയുടെയും….അവളുടെ ബന്ധുക്കളുടെയും വാക്ക്ശരങ്ങളേറ്റ് നെഞ്ചിൽ ആഴത്തിലുള്ള മുറിവേറ്റിട്ടും ഹരി പ്രകോപിതനായില്ല….!!
അവർ തന്നിൽ ഇല്ലാത്തതും പൊല്ലാത്തതുമായ കാര്യങ്ങൾ കെട്ടിയാരോപിച്ചപ്പോഴും….കണ്ണൊന്ന് നിറഞ്ഞതല്ലാതെ ചുണ്ടിലെ ചിരി മായാതിരിക്കാൻ ഹരി നാരായണൻ പരമാവധി ശ്രമിച്ചു…!!
അവൾ തന്നിൽ നിന്ന് മോചനം നേടിയെങ്കിലും താൻ താലികെട്ടിയ….ആദ്യമായി പ്രണയിച്ച….ശരീരം പങ്കിട്ട ജീവിത പങ്കാളിയാണ് മറ്റുള്ളവരുമായി ചേർന്ന് തന്നെ തെറ്റുകാരനാക്കാൻ ശ്രമിക്കുന്നത്….!!
അവളുടെ ഇഷ്ടമില്ലാതായോ…സമ്മതം കൂടാതെയോ…അവളുടെ ദേഹത്ത് തൊട്ടിട്ടില്ലാത്ത തന്നെയാണ് ….വിടനാക്കി മാറ്റാൻ ശ്രമിക്കുന്നത്….!
അതോർത്തപ്പോൾ ഹരിയുടെ നെഞ്ച് നീറിപ്പുകഞ്ഞു….മിഴികൾ നിറഞ്ഞു….!!
ഹരിയുടെ മൗനം എതിരാളികൾക്ക് ആവേശമായി….ആരോപണങ്ങൾക്ക് ശക്തികൂട്ടി….ഒച്ചയുയർന്നു.
ഉടനെ എത്തി അവതാരികയുടെ ചോദ്യം….!!
“എന്ത് കഷ്ടായിത്…!
അതോടെ ഒരു നിമിഷത്തേക്ക് ഒച്ചകൾ നിലച്ചു.
ക്യാമറക്കണ്ണുകൾ വിവിധ ആംഗിളിൽ നിന്ന് ഹരിയുടെയുടെയും…. പ്രീതയുടെയും വിഷ്വലുകൾ ഒപ്പിയെടുത്തു….!!
അല്ലേലും ആരാന്റെ തള്ളയ്ക്ക് ഭ്രാന്ത് വന്നാൽ കാണാൻ നല്ല ചേലാണല്ലോ?
ഹരിയുടെ മറുപടി ചെറിയ ചില മൂളലുകളിൽ ഒതുങ്ങി…..മാത്രമല്ല പ്രീതയ്ക്കെതിരെ ഒരൊറ്റ ആരോപണങ്ങൾ ഉന്നയിച്ചതുമില്ല….!!
വന്നു ഹരി പ്രതീക്ഷിച്ചിരുന്ന ചോദ്യം.
ഇവർ പറഞ്ഞത് അംഗീകരിക്കുന്നുണ്ടോ?
“ഉം….അംഗീകരിക്കുന്നു….!!
നിയമ വിദഗ്ദ്ധരുമായി കൂടിയാലോചനകൾ അവസാനം അവരുടെ തീർപ്പ് വന്നു….!!
“പഠനചിലവിനും മറ്റാവശ്യങ്ങൾക്കായി അഞ്ച് ലക്ഷം രൂപ പതിനഞ്ച് ദിവസത്തിനുള്ളിൽ മകൾക്ക് നൽകുക”
അതിനും ഹരി തലയാട്ടുക മാത്രമേ ചെയ്തുള്ളൂ….!!
പതിനഞ്ചാമത് നാൾ….അവർ പറഞ്ഞ തുക മകളുടെ കൈകളിലേക്ക് നൽകുമ്പോൾ…ഹരിയുടെ കൈകൾ വിറകൊണ്ടു.
തന്റെ മകൾ വലുതായിരിക്കുന്നു….
അമ്മയെ പോലെ സുന്ദരിയാണ്….പ്രീതയുടെ മൂക്കിലെ ചെറിയ വളവുപോലും കുഞ്ഞാറ്റയ്ക്ക് കിട്ടിയിട്ടുണ്ട്….!!
ആ ചുണ്ടിലൊരു ചിരിയുണ്ടോ ? ഇല്ല എങ്ങനെയാണ് ചിരിക്കാൻ കഴിയുക…..അവളുടെ മനസ്സിൽ താൻ ചതിയനാണ്….കൊള്ളരുതാത്തവനാണ്…!!
ഹരിയെ അമ്പരപ്പിച്ചുകൊണ്ട് കുഞ്ഞാറ്റ ചിരിച്ചു….ഒരു നിറകൺ ചിരി….!!
ഹരിയുടെ മിഴികളും നിറഞ്ഞിരുന്നു…..ഒൻപത് വർഷത്തിന് ശേഷമാണ് മകളെ കാണുന്നത്.
കുഞ്ഞാറ്റയെ ഒന്ന് നെഞ്ചോട് ചേർത്തുപിടിക്കണമെന്നുണ്ടായിരുന്നു ഹരിയ്ക്ക്…തന്റെ ജീവന്റെ പാതിയാണ്…അച്ഛന്റെ വാത്സല്യമറിയാതെ വളരുന്നത്…..!!
അപ്പോഴേക്കും പ്രീതയുടെ ‘അമ്മ കുഞ്ഞാറ്റയെ പിടിച്ചു സെറ്റിയിലേക്ക് ഇരുത്തി.
പിന്നെ ബാലാമണിയുടെ കുറെ ഉപദേശം രണ്ടു കൂട്ടർക്കും…!
അതിനു ശേഷം അവരെല്ലാം പിരിഞ്ഞു….ഫ്ലോറിലെ ലൈറ്റുകൾ അണഞ്ഞു…ഏ.സി യുടെ തണുപ്പിലും ഹരി നാരായണനെ വിയർക്കുന്നുണ്ടായിരുന്നു….ദേഹമാസകലം ഒരു തളർച്ച പടരുന്നതായി ഹരിയ്ക്ക് തോന്നി….അവൻ അവിടെത്തന്നെ ഇരുന്നു….!!
പുറത്തേക്കിറങ്ങാനായി അതിലേ വന്ന ബാലമണി….അവിടെത്തന്നെ ഇരിക്കുന്ന ഹരിയെ കണ്ട്.
“എന്താ ഹരീ….ഇവിടെ തന്നെ ഇരുന്ന് കളഞ്ഞത്….!
ഹരിയുടെ മുഖഭാവം കൊണ്ടാവണം ബാലാമണി ചോദിച്ചു.
“ഹരിക്കെന്നോടെന്തെങ്കിലും പറയാനുണ്ടോ?
ഉണ്ടെന്നവൻ തലയാട്ടി.
“ഞാൻ ആദ്യമായിട്ടാണ് ഇവിടെ വന്ന് എല്ലാ കുറ്റങ്ങളും സമ്മതിക്കുന്നൊരാളെ കാണുന്നത്….മാത്രമല്ല എതിരാളിക്കെതിരെ ഒരു ആരോപണവും ഉന്നയിച്ചുമില്ല….!!
“പ്രീതയ്ക്കെതിരെ പറയാൻ കുറ്റങ്ങൾ ഇല്ലാഞ്ഞിട്ടല്ല….അവളുടെ കുറ്റങ്ങളും കുറവുകളും മറ്റുള്ളവർ….പ്രത്യേകിച്ചു ദേവനന്ദ കേൾക്കേണ്ട എന്ന് വെച്ചിട്ടാണ്…അവളുടെ ‘അമ്മ തെറ്റുകാരിയാണെന്ന് അവളറിയേണ്ട….എന്തായാലും അവളുടെ അച്ഛൻ മോശക്കാരനാണെന്ന് ദേവു വിചാരിക്കുന്നുണ്ടാവും…!
ഹരിയുടെ തൊണ്ടയിടറി.
“അതങ്ങനെ തന്നെയിരുന്നോട്ടെ…!!
“എന്നിട്ട് അവർ പറഞ്ഞത് താങ്കളാണ് തെറ്റുകാരൻ എന്നാണല്ലോ താങ്കൾ അംഗീകരിക്കുകയും ചെയ്തു….!!
ബാലാമണി എതിർ വാദമുന്നയിച്ചു.
“അതിപ്പോ…. നല്ല ഉയരമുള്ള കുന്നിൻ മുകളിൽ നിന്ന് നോക്കുമ്പോൾ താഴെയുള്ള വാഹനങ്ങൾ….ഒരു തീപ്പെട്ടി കൂടിനോളം മാത്രമേ ഉണ്ടാവൂ….വാസ്തവത്തിൽ അത്രേയുള്ളോ….അതുപോലെയാണ് ജീവിതവും….പുറമേ നിന്ന് നോക്കുമ്പോഴുള്ള ഭംഗിയുണ്ടാവില്ല…പലതിനും….!!
“താങ്കൾ തന്നെയല്ലേ പറഞ്ഞത് താങ്കൾക്ക് വേണ്ടിയാണ് ജീവിച്ചതെന്ന്..?
“അതെ എനിക്ക് വേണ്ടി മാത്രമാണ് ജീവിച്ചത്…!
ഹരി ഒന്ന് നിർത്തിയിട്ട് തുടർന്നു.
“ചിലർ പറയുന്നത് കേൾക്കാം…മറ്റുള്ളവർക്ക് വേണ്ടി ജീവിച്ചു….മറ്റുള്ളവർക്ക് വേണ്ടി ജീവിച്ചൂ എന്ന്. അതെങ്ങിനെയാണെന്ന് എനിക്ക് മനസ്സിലാവുന്നില്ല….എന്റെ മാതാപിതാക്കളെ….എന്ത് ഭാര്യയെ…കുഞ്ഞുങ്ങളെ…സംരക്ഷിക്കേണ്ടത്…ചിലവിന് നൽകേണ്ടത്….എന്റെ കടമയാണ്….ബാധ്യതയാണ്…അങ്ങിനെ വരുമ്പോൾ ഞാൻ എനിക്ക് വേണ്ടി തന്നെയാണ് ജീവിച്ചത്….ഇനിയും അങ്ങിനെതന്നെ ആയിരിക്കാനാണ് എനിക്കിഷ്ടം….!!
“എനിക്ക് താങ്കളെ മനസ്സിലാക്കാൻ സാധിക്കുന്നില്ല ഹരീ….!!
“മാഡത്തിന് മാത്രമല്ല…. ആർക്കും ഈ ഹരിയെ മനസിലാക്കാൻ സാധിച്ചിട്ടില്ല…..ചിലനേരങ്ങളിൽ അമ്മയ്ക്ക് പോലും…!!
ഹരിയുടെ മിഴികൾ ഈറനണിഞ്ഞിരുന്നു.
“മാഡത്തിനറിയുവോ….നല്ല സന്തോഷം നിറഞ്ഞ ജീവിതമായിരുന്നു ഞങ്ങളുടേത്….ഒരു വർഷം കഴിഞ്ഞപ്പോഴേക്കും കുഞ്ഞാറ്റ ഞങ്ങൾക്കിടയിലേക്ക് വന്നു.ഞങ്ങളുടെ ലോകം കൂടുതൽ വിശാലമായി….കൂടുതൽ വർണ്ണങ്ങളുടേതായിത്തീർന്നു.
മോൾക്ക് ഒന്നര വയസ്സുള്ളപ്പോഴാണ് ഗൾഫിൽ പോകാൻ വിസ റെഡിയാകുന്നത്….യാത്രപറഞ്ഞിറങ്ങുമ്പോൾ നൂറ് മീറ്റർ അപ്പുറമുള്ള റോഡിലെത്തിയിട്ടും എനിക്ക് കേൾക്കാമായിരുന്നു കുഞ്ഞാറ്റയുടെ കരച്ചിൽ….അതിപ്പോഴും കാതിൽ മുഴങ്ങുന്നുന്നുണ്ട്…!!
അവിടെ ചെന്നപ്പോൾ പറഞ്ഞ ജോലി ആയിരുന്നില്ല….ശമ്പളവും പറഞ്ഞതിന്റെ പകുതി മാത്രമേ ഉണ്ടായിരുന്നുള്ളു…!
” കടം വീട്ടി തീരുന്നത് വരെ നല്ല ഭക്ഷണം കഴിച്ചിട്ടില്ല….ഇവിടെ നിന്ന് കൊടുപോയതല്ലാതെ….ഒരുവസ്ത്രം പോലും വാങ്ങിയിട്ടില്ല…!
ഹരിയുടെ സ്വരം ആർദ്രമായി….മിഴികൾ നിറഞ്ഞു…!
ഇവിടെ പ്രീതയോ…. കെട്ടുപൊട്ടിച്ചൊന്ന് പറക്കണമെന്ന് തോന്നി അവൾക്ക് ….പക്ഷെ പട്ടത്തിനറിയില്ലായിരുന്നു നൂല് പൊട്ടിയാൽ അതിന് നിലനില്പില്ലെന്ന്….നിയന്ത്രണം നഷ്ടമാകുമെന്ന്…പുതിയ മേച്ചിൽ പുറങ്ങൾ തേടിയവൾ അലഞ്ഞു….അതിലവൾ ആനന്ദം കണ്ടെത്തിയിരുന്നു…!!
ഒരുനാൾ അമ്മയുടെ ഫോൺ കോൾ.’അമ്മ ഇങ്ങോട്ട് വിളിക്കാറില്ലാത്തതാണ്…നാട്ടിൽ നിന്ന് ഒരു കാൾ വന്നാൽ ഏത് പ്രവാസിക്കും നെഞ്ചിടിപ്പാണ്…..!!
ഞാൻ ഭീതിയോടെ തിരികെ വിളിക്കുമ്പോൾ ‘അമ്മ പറഞ്ഞ കാര്യങ്ങൾ എനിക്കുൾക്കൊള്ളാനാകുമായിരുന്നില്ല…മുഴുവൻ കേൾക്കാനുള്ള ത്രാണിയും ഉണ്ടായിരുന്നില്ല….എന്നിട്ടും ഞാനത് അമ്മായിയമ്മയുടെ ആരോപണം മാത്രമായി കണക്കാക്കി….!!
ഞാൻ തിരികെ വന്നപ്പോഴേക്കും….പ്രീതയ്ക്ക് ആകെയൊരു മാറ്റം.
തനിനാടൻ പെൺകുട്ടിയായിരുന്ന പ്രീതയ്ക്ക്….. ശരീരത്തിലെ അഴകളവുകൾ എടുത്ത് കാട്ടുന്ന വസ്ത്രങ്ങളോടുള്ള ഭ്രമം എന്നെ വിസ്മയിപ്പിച്ചു….!!
വന്നന്നുമുതൽ ശാരീരിക ബന്ധത്തിന് ഓരോ തടസ്സങ്ങൾ പറഞ്ഞു തുടങ്ങി.തലവേദന…നടുവേദന എന്നിങ്ങനെ പലതരം വേദനകൾ….!!
വന്നിട്ട് ഒരാഴ്ച കഴിഞ്ഞ ദിവസം ഉച്ചമയക്കത്തിലയിരുന്ന ഞാൻ…..ഫോൺ മുരളുന്ന ഒച്ചകേട്ട് കണ്ണ് തുറന്നു….!
ഭാര്യയുടേതാണ്…അവൾ പുറത്തുള്ള കുളിപ്പുരയിലും….!!
മെസ്സേജാണ്….അന്നൊക്കെ മെസ്സേജിന്റെ കാലമാണ്.ഞാനതെടുത്തു നോക്കി.
“നീ എന്താ ഫോണെടുക്കാത്തത്…നമുക്കൊന്ന് കൂടെണ്ടേ….?
നട്ടെല്ലിലൂടെ ഒരു തരിപ്പ് പാഞ്ഞുപോയി….!!
മനസ്സിലൊരു തീപ്പൊരി വീണു.
ഞാനാ നമ്പറിൽ വിളിച്ചു….പുരുഷ ശബ്ദം കേട്ട അയാളൊന്ന് പകച്ചു….!
അയാളുടെ ആരാണ് നീ എന്ന ചോദ്യത്തിന് “ഭർത്താവാണ്”
എന്ന മറുപടി കേട്ടതും അവന്റെ മറുചോദ്യം.
“അവളുടെ ഏത് ഭർത്താവ്….അവൾക്ക് ഒരുപാട് ഭർത്താക്കന്മാരുണ്ട്….അതിലേതാണ് നീ….!!
ലോകത്തൊരാണിനും കേട്ട് നില്ക്കാൻ കഴിയാത്ത ചോദ്യം…!!
മനസ്സിൽ അശാന്തിയുടെ തിരമാലകൾ ആഞ്ഞടിച്ചുകൊണ്ടിരുന്നു….
