വേണു നൈമിഷിക. (Street Light fb group)
നടക്കാം, നമുക്കല്പ്പം
ചുമലുകളടുപ്പിച്ചു നോക്കാം
വിരലിൽ വിരൽകോർത്തു ചുമ്മാ
വെയിലേൽക്കുമീ വഴിത്താരയിലൂടെ
എനിക്കും നിനക്കും
ഇനി സമയമധികമില്ല !
ചിന്തകൾക്കന്തരമുണ്ടാകാം
വാക്കുകൾ കലഹപ്പെടുത്താം
ക്രൂദ്ധനോട്ടങ്ങൾ പിൻവലിക്കാം
കൂട്ടിന്നുകൂട്ടായി നോക്കാം
ചിരിച്ചുല്ലസിക്കാം, ചെറുകഥകൾ
പറഞ്ഞു പാടാം, രസിക്കാം
എനിക്കും നിനക്കും
ഇനി സമയമധികമില്ല !
ബാല്യത്തിലേക്കു നടന്നുപോകാം
ചോറ്റുപാത്രങ്ങളിൽ കൈയിട്ടുവാരാം
മൂക്കൊലിപ്പിക്കാം, കൈകൊണ്ടു
തൂത്തുകളയാം, നമ്മുടെ
പിണക്കങ്ങളൊക്കെയും
എനിക്കും നിനക്കും
ഇനി സമയമധികമില്ല !
നാളെയൊരിക്കൽ , ഞാനും നീയും
ദിക്കുകളറിയാതുഴറുമ്പോൾ
ഒരു വാക്കിനായ്, ഒരു നോക്കിനായ്
മനസ്സുകരയുമ്പോൾ
മോഹങ്ങൾ മോഹഭംഗങ്ങളായി
നമ്മുടെ ചിതകൾ ദഹിപ്പിക്കും
എനിക്കും നിനക്കും
ഇനി സമയമധികമില്ല !
