ഞാൻ സ്വയം രക്തസാക്ഷി (കവിത)

രാജി കൃഷ്ണകുമാര്‍

സൈന്ധവ ഹൃദയത്തിൽ
പുഴുക്കുത്തുകൾ പടരവേ
നെടുവീർപ്പിലമരുന്നു
ഞാനുമെൻ പ്രണയവും
അന്ധകാരത്തിന്റെ നാട്ടിൽനിന്നും
വന്ന വെളുത്ത നരഭോജികൾ ചിരിക്കുന്നു
ഉലയിൽ ഉരുക്കി പതം വരുത്തുന്നു
ചിന്തകൾക്കണിയിക്കാനൊരു കറുത്ത ചങ്ങല
യമുനയിൽ ചിതറിയ
പ്രണയോപഹാരത്തിന്
വെണ്ണക്കൽച്ചീളുകൾ.
തകർന്ന സ്തംഭത്തിൽ
നിന്നടർന്നുവീണ ചക്രത്തിലൊ-
രരചന്റെ കണ്ണുനീർ
തിലോദകം കിട്ടാതെ
ഗംഗയിലൂടൊഴുകുന്ന
കറുത്ത കബന്ധങ്ങളിലൊന്നിലൊരു
വിപ്ലവ കവിത തുടിക്കുന്നു
ഏതോ ബോധിമരച്ചുവട്ടി
ലലയുന്നെന്നാത്മാവതു കേട്ട്
കോരിത്തരിക്കുന്നു
ഞാൻ സ്വയം രക്തസാക്ഷി!