ജോണ്‍സണ്‍ ചെറിയാന്‍.
പ്രണവ് മോഹന്‍ലാല്‍ നായകനായി അരങ്ങേറ്റം കുറിക്കുന്ന ആദിയെക്കുറിച്ച്‌ സംവിധായകന്‍ ജീത്തു ജോസഫ്. തിരുവനന്തപുരത്ത് വച്ച്‌ ബുധനാഴ്ചയായിരുന്നു ചിത്രത്തിന്റെ പൂജ നടന്നത്. മോഹന്‍ലാല്‍ നായകനാകുന്ന ഒടിയന്റെ ഫസ്റ്റ്ലുക്കും ലാല്‍ ജോസ് സംവിധാനം ചെയ്യുന്ന വെളിപാടിന്റെ പുസ്തകത്തിന്റെ ടീസറും ഇതോടൊപ്പം പുറത്തിറക്കി.ആദിയിലേക്ക് പ്രണവിനെ ആകര്‍ഷിച്ച പ്രധാന ഘടകം ഈ ചിത്രത്തില്‍ പ്രണയമില്ല എന്നതാണെന്ന് സംവിധായകന്‍ പറയുന്നു.
‘ഈ സിനിമയില്‍ നായികയുണ്ട്. എന്നാല്‍ പ്രണയമില്ല. പ്രണവിന് ഇഷ്ടമായ ഘടകങ്ങളിലൊന്ന് അതാണ്’- ജീത്തു വെളിപ്പെടുത്തുന്നു.
ഇതുവരെ ചെയ്ത എട്ട് സിനിമകളില്‍ അനുഭവിക്കാത്ത ടെന്‍ഷനാണ് ഈ ചിത്രത്തിനുവേണ്ടി അനുഭവിക്കുന്നതെന്ന് ജീത്തു ചടങ്ങില്‍ സംസാരിക്കുന്നതിനിടെ പറഞ്ഞിരുന്നു. എവിടെ ചെന്നാലും ചിത്രത്തെക്കുറിച്ചുള്ള ചോദ്യങ്ങള്‍ നേരിട്ടുകൊണ്ടിരിക്കുകയാണെന്ന് ജീത്തു പറഞ്ഞു. ‘എല്ലാവര്‍ക്കും പ്രണവിന്റെ കഥാപാത്രത്തെയും ചിത്രത്തിന്റെ കഥയെക്കുറിച്ചും അറിയണം. എന്നാല്‍, ഒന്നും ഭയക്കേണ്ട, ചിത്രത്തിനുവേണ്ട എന്ത് പിന്തുണയും ഉണ്ടാകുമെന്നാണ് ആന്റണി പെരുമ്പവൂര്‍ വാക്ക് തന്നത്’- ജീത്തു കൂട്ടിച്ചേര്‍ത്തു. ചില കള്ളങ്ങള്‍ മാരകമായേക്കുമെന്നതാണ് ആദിയുടെ ടാഗ്ലൈന്‍. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പവൂരാണ് ചിത്രം നിര്‍മിക്കുന്നത്.
