പി പി ചെറിയാൻ.
ലാസ് വെഗാസ് : അമേരിക്കയിലെ ലാസ് വെഗാസിലുള്ള മൗണ്ടൻസ് എഡ്ജ് റീജിയണൽ പാർക്കിൽ സംഗീതം ആസ്വദിച്ച് സ്കൂട്ടർ ഓടിച്ചുപോവുകയായിരുന്ന യുവാവിനെ ഒരു സംഘം പ്രായപൂർത്തിയാകാത്ത കുട്ടികൾ വളഞ്ഞിട്ട് ആക്രമിച്ചു. ഏഴ് കുട്ടികൾ ചേർന്ന് നടത്തിയ ഈ ക്രൂരമായ മർദ്ദനത്തിൽ യുവാവിന്റെ താടിയെല്ല് തകർന്നു.
2024 ജനുവരി 18-നാണ് കേസിനാസ്പദമായ സംഭവം നടന്നത്. മുഖംമൂടി ധരിച്ചെത്തിയ ഏഴംഗ സംഘമാണ് ആക്രമണം നടത്തിയത്.
ആക്രമണം നടത്തിയ കുട്ടികൾക്കെതിരെ മാത്രമല്ല, അവരുടെ മാതാപിതാക്കൾക്കെതിരെയും കൗണ്ടി (Clark County) ഭരണകൂടത്തിനെതിരെയും ഇരയായ യുവാവ് കോടതിയിൽ കേസ് ഫയൽ ചെയ്തു.
നെവാഡ നിയമപ്രകാരം കുട്ടികൾ ചെയ്യുന്ന കുറ്റകൃത്യങ്ങൾക്ക് മാതാപിതാക്കളെ ഉത്തരവാദികളാക്കാൻ വ്യവസ്ഥയുണ്ട്. ഓരോ കുട്ടിയുടെയും മാതാപിതാക്കളിൽ നിന്നും 10,000 ഡോളർ വീതം പിഴ ഈടാക്കാൻ സാധ്യതയുണ്ടെന്ന് നിയമവിദഗ്ധർ ചൂണ്ടിക്കാട്ടുന്നു.
ഈ പാർക്ക് ഇപ്പോൾ സുരക്ഷിതമല്ലെന്നും, സ്കൂൾ സമയം കഴിയുന്നതോടെ കുട്ടികൾ സംഘം ചേർന്ന് എത്താറുണ്ടെന്നും നാട്ടുകാർ പരാതിപ്പെടുന്നു. ഭയം കാരണം പലരും ക്യാമറയ്ക്ക് മുന്നിൽ സംസാരിക്കാൻ പോലും തയ്യാറായില്ല.
പാർക്കിലെത്തുന്ന ഭൂരിഭാഗം കൗമാരക്കാരും ആരോഗ്യപരമായ കാരണങ്ങൾക്കല്ല, മറിച്ച് തങ്ങളുടെ വ്യക്തിത്വം മറച്ചുവെക്കാനാണ് മുഖംമൂടികൾ ധരിക്കുന്നത് എന്ന് നാട്ടുകാർ പറയുന്നു.
പാർക്കിൽ ഇ-ബൈക്കുകൾക്കും സ്കൂട്ടറുകൾക്കും നിയന്ത്രണങ്ങളുണ്ടെങ്കിലും (വേഗത 15 mph-ൽ താഴെയായിരിക്കണം, ഹെൽമറ്റ് നിർബന്ധം), അതൊന്നും ആരും പാലിക്കാറില്ല.
പാർക്കിലെ സ്ഥിരമായ അതിക്രമങ്ങളെക്കുറിച്ച് അറിവുണ്ടായിട്ടും ആവശ്യമായ സുരക്ഷാ ക്രമീകരണങ്ങൾ ഏർപ്പെടുത്തിയില്ല എന്നതിനാലാണ് കൗണ്ടി ഭരണകൂടത്തെയും കേസിൽ കക്ഷി ചേർത്തത്.
ഒരു കുടുംബ പാർക്ക് സ്കൂൾ സമയം കഴിയുമ്പോൾ കുട്ടികൾ അഴിഞ്ഞാടുന്ന സ്ഥലമായി മാറുന്നത് ഗൗരവകരമായ സാമൂഹിക പ്രശ്നമാണെന്ന് റിപ്പോർട്ട് ചൂണ്ടിക്കാട്ടുന്നു. സുരക്ഷിതമായിരിക്കേണ്ട പൊതുവിടങ്ങൾ ഭയത്തിന്റെ കേന്ദ്രങ്ങളായി മാറുന്നതിനെതിരെ ശക്തമായ നടപടികൾ വേണമെന്നാണ് പ്രദേശവാസികളുടെ ആവശ്യം.
