ഷാര്‍ജ തീപിടിത്തം; മലപ്പുറം സ്വദേശിയടക്കം രണ്ടുപേര്‍ മരിച്ചു.

ജോണ്‍സണ്‍ ചെറിയാന്‍.

ഷാര്‍ജ: ഷാര്‍ജയിലുണ്ടായ തീപിടിത്തത്തില്‍ മലയാളി ഉള്‍പ്പെടെ രണ്ടുപേര്‍ മരിച്ചു. മലപ്പുറം നിലമ്പൂര്‍ ചുങ്കത്തറ സ്വദേശി കണ്ണന്തറ ദീപന്‍ ബാലകൃഷ്ണന്‍ (26), ബംഗ്ലാദേശ് സ്വദേശിയായ ഇമാന്‍ (32) എന്നിവരാണ് മരിച്ചത്. അപകടത്തില്‍ മറ്റു അഞ്ചു പേര്‍ക്ക് പരിക്കേറ്റു.

വെള്ളിയാഴ്ച രാത്രി ഇന്ത്യന്‍ സമയം 12.15 നാണ് അല്‍ അറൂബ സ്ട്രീറ്റിലെ അല്‍ മനാമ സൂപ്പര്‍ മാര്‍ക്കറ്റ് പ്രവര്‍ത്തിക്കുന്ന കെട്ടിടത്തില്‍ തീപ്പിടിത്തമുണ്ടായത്. 16 നിലകളാണ് കെട്ടിടത്തിനുള്ളത്. ഇതില്‍ ഏറ്റവും താഴെ പ്രവര്‍ത്തിച്ചിരുന്ന അല്‍മനാമാ സൂപ്പര്‍ മാര്‍ക്കറ്റ് പൂര്‍ണമായും കത്തി നശിച്ചു. തീപ്പിടിത്തത്തിന്റെ കാരണം വ്യക്തമായിട്ടില്ല. പോലീസ് അന്വേഷണം നടത്തി വരികയാണ്.

ഷരിയ സിവില്‍ ഡിഫന്‍സിന്റെ നേതൃത്വത്തിലാണ് തീ അണച്ചത്. മലയാളികള്‍ കൂട്ടത്തോടെ താമസിക്കുന്ന കെട്ടിടമാണ് ഇത്. അവധി ദിവസമായിരുന്നതിനാല്‍ ഇവിടെ താമസിക്കുന്ന പലരും പുറത്ത് പോയതാണ് ദുരന്തത്തിന്റെ ആഘാതം കുറക്കാനിടയാക്കിയത്.