ശില്പിയും ശില്പവും. (കവിത)

രശ്മി സജയൻ. (Street Light fb group)

ശില്പിയുടെ കരവിരുതാൽ ശില്പം മെനഞ്ഞു

അംഗപ്രത്യംഗങ്ങളെല്ലാം മനസ്സിന്നളവുകോലാൽ കൃത്യം

കാഴ്ചയിൽ ജീവൻ തുടിക്കും ശില്പം

ശില്പിയുടെ മനസ്സിലപൂർണ്ണത

എവിടേയോ പാകപ്പിഴ പോലെ

ശില്പത്തിന്റെ നെറ്റിയിൽ തൊട്ടു
കവിളിൽ തൊട്ടു

പുരികങ്ങൾ, കണ്ണുകൾ,മൂക്ക് , ചെവിയെല്ലാം
പാകത്തിൽ പാകം

എന്താണൊരപൂർണ്ണത?

ശില്പത്തെ വിശകലനം ചെയ്തു, ശില്പി
എങ്ങുമൊന്നും കണ്ടെത്താനായില്ല

അപുർണ്ണത മനസ്സിന്റെ താളം തെറ്റിക്കുന്നു

ശില്പി ശില്പത്തെ വീണ്ടും വീണ്ടും നോക്കി

കണ്ടെത്തി, കണ്ണുകളിലാണ് പോരായ്മ

കണ്ണുകളിലെ ഭാവമെന്തെന്നു തിരിച്ചറിയാനാകുന്നില്ല

പ്രണയമോ, വാല്സല്യമോ , വിഷാദമോ
നൊമ്പരമോ

കണ്ണുകളിലൊളിച്ചിരിക്കുന്ന ഭാവമേതാണ്?

അഴകളവുകളുടെ കണക്കു കൂട്ടലിനിടയിൽ
ഭാവത്തിനെക്കുറിച്ച് ചിന്തിച്ചതേയില്ല

കണ്ണുകളിൽ തെളിഞ്ഞു നില്ക്കുന്ന ദൈന്യഭാവം

ശില്പത്തിന്റെയപൂർണ്ണത

ഇനിയൊന്നും ചെയ്യാനാവില്ല ഒന്നും

കണ്ണുകളിൽ ദീനതയൊളിപ്പിച്ച ശില്പവും ശില്പിയും

സ്മൃതിയുടെ ആഴങ്ങളിൽ ചേക്കേറിയെങ്ങോ പോയൊളിച്ചു