പി പി ചെറിയാൻ.
അറ്റ്ലാന്റ:അമേരിക്കയിലെ പ്രശസ്ത പിസ്സ ശൃംഖലയായ പാപ്പാ ജോൺസ് തങ്ങളുടെ 300 ഓളം ഔട്ട്ലെറ്റുകൾ അടച്ചുപൂട്ടാൻ ഒരുങ്ങുന്നു. കമ്പനിയുടെ ചീഫ് ഫിനാൻഷ്യൽ ഓഫീസർ രവി താനാവാലയാണ് ഈ വിവരം പുറത്തുവിട്ടത്.
കമ്പനിയുടെ ലാഭക്ഷമത വർദ്ധിപ്പിക്കുന്നതിനും ബ്രാൻഡിന്റെ പ്രവർത്തനം കൂടുതൽ ശക്തമാക്കുന്നതിനുമാണ് ഈ തീരുമാനം. പ്രതീക്ഷിച്ച വരുമാനം നൽകാത്തതും സാമ്പത്തികമായി മെച്ചപ്പെടാൻ സാധ്യതയില്ലാത്തതുമായ ശാഖകളാണ് അടച്ചുപൂട്ടുന്നത്.
അടുത്ത രണ്ട് വർഷത്തിനുള്ളിൽ ഈ നടപടി പൂർത്തിയാകും. ഇതിൽ ഭൂരിഭാഗം ഔട്ട്ലെറ്റുകളും 2026-ഓടെയും ബാക്കിയുള്ളവ 2027-ഓടെയും പ്രവർത്തനം നിർത്തും.
അമേരിക്കയിലുടനീളമുള്ള പാപ്പാ ജോൺസ് റെസ്റ്റോറന്റുകളുടെ ഏകദേശം 9 ശതമാനത്തെ ഈ തീരുമാനം ബാധിക്കും. അടച്ചുപൂട്ടുന്നവയിൽ ഭൂരിഭാഗവും ഫ്രാഞ്ചൈസി അടിസ്ഥാനത്തിൽ പ്രവർത്തിക്കുന്നതും 10 വർഷത്തിലധികം പഴക്കമുള്ളതുമായ സ്ഥാപനങ്ങളാണ്.
നഷ്ടത്തിലുള്ള കടകൾ ഒഴിവാക്കി, കൂടുതൽ സാധ്യതയുള്ള വിപണികളിൽ ശ്രദ്ധ കേന്ദ്രീകരിക്കാനും നിലവിലുള്ള മറ്റ് റെസ്റ്റോറന്റുകളുടെ നിലവാരം ഉയർത്താനും ഇതിലൂടെ സാധിക്കുമെന്ന് രവി താനാവാല വ്യക്തമാക്കി.
നേരത്തെ മറ്റൊരു പ്രമുഖ പിസ്സ ബ്രാൻഡായ പിസ്സ ഹട്ടും തങ്ങളുടെ ലാഭകരമല്ലാത്ത ചില ശാഖകൾ പൂട്ടാൻ തീരുമാനിച്ചിരുന്നു. അതിനു പിന്നാലെയാണ് പാപ്പാ ജോൺസിന്റെയും ഈ നീക്കം.
