പട്ടടയില്‍നിന്നൊരു പാട്ട്.(കവിത)

മഞ്ജുള ശിവദാസ്‌ റിയാദ്.

വെറുപ്പിന്‍ കനല്‍നോട്ടമെയ്തെന്നെ നോവിച്ച-

കണ്ണുകളിലെന്തിനിന്നനുതാപ നീരുറവ?

ഇന്നോളമെന്നിലറപ്പു ദര്‍ശിച്ചവര്‍,ഇന്നെന്‍റെ-

മൃത്യുവുറപ്പാക്കി മാപ്പിരക്കുന്നുവോ?

ഉയിരുള്ള കാലത്തു ഭ്രഷ്ടുകല്‍പ്പിച്ചവര്‍-

ഇന്നെന്‍റെ ചത്ത ദേഹത്തെയുടപ്പിറപ്പാക്കുവോര്‍!!

നിര്‍ലജ്ജമിനിയുമീ പാഴ്മൊഴികളുരചെയ്തു-

പരിഹസിക്കാതെന്‍റെ മൃതശരീരത്തെയും.

ഇനിയെന്നെ പിന്തുടര്‍ന്നീടരുത്,,നിങ്ങളെ-

ന്നാത്മാവിനെങ്കിലും ശാന്തിതരികാ…

അവസാന പട്ടിണിക്കോലമല്ലീഞാന്‍-

അനീതികള്‍ക്കവസാനയിരയുമല്ലാ…

ഉച്ചനീചത്വങ്ങളതിരിട്ടകറ്റിയ,-

സ്വപ്നങ്ങളില്ലാത്ത നരജാതികള്‍ക്കായ്,

ഇനിയും മരിക്കാത്തവര്‍ക്കു ജീവിക്കുവാന്‍-

ഉയിരിന്നു കൂട്ടായ പാട്ടുകെട്ടീടുക.