ബിഷപ് ഡോ. മാർ ഫിലക്സിനോസിന്റെ എപ്പിസ്‌കോപ്പൽ രജത ജൂബിലിയുടെ സമർപ്പണമായി പുസ്തകം പ്രകാശനം ചെയ്തു.

0
64

ഷാജി രാമപുരം.
                              
അറ്റ്ലാന്റാ: മാർത്തോമ്മ  സഭയുടെ നോർത്ത് അമേരിക്ക – യൂറോപ്പ് ഭദ്രാസനാധിപൻ ആയ ബിഷപ് ഡോ.ഐസക്ക് മാർ ഫിലക്സിനോസിന്റെ മേൽപട്ടത്വ ശ്രുശ്രുഷയുടെ രജത ജൂബിലിയുടെ സമർപ്പണമായി ഭദ്രാസനം ആൻ എക്യൂമെനിക്കൽ ജേർണി ടുവെഡ്സ് ട്രാൻസ്ഫോർമേഷൻ (An Ecumenical Journey Towards Transformation) എന്ന പുസ്തകം പ്രകാശനം ചെയ്തു.

അറ്റ്‌ലാന്റയിൽ കാർമേൽ മാർത്തോമ്മ സെന്ററിന്റെ കൂദാശയോട് അനുബന്ധിച്ച് നടന്ന പ്രത്യേക ചടങ്ങിൽ മാർത്തോമ്മ സഭയുടെ പരമാധ്യക്ഷൻ ഡോ. ജോസഫ് മാർത്തോമ്മ മെത്രാപ്പോലീത്തായാണ് പുസ്തകം അനേക വിശിഷ്ടാധിതികളുടെ സാന്നിധ്യത്തിൽ പ്രകാശനം ചെയ്തത്. ഭദ്രാസന ലീഗൽ അഡ്വൈസറും, എഡിറ്റോറിയൽ അംഗവും ആയ അറ്റേർണി ലാൽ വർഗീസ് ആണ് ചടങ്ങിനായി മെത്രാപ്പോലീത്തായെ ക്ഷണിച്ചത്.

കാലോചിത ദൗത്യത്തിന്റെ ദൈവീക ദർശനമായി ഇടയപരിപാലനത്തിന്റെ ശ്രേഷ്ടതയിൽ സാമൂഹിക നീതിയുടെയും, സമാധാനത്തിന്റെയും , കർമ്മനിരതമായ നിതാന്ത പരിശ്രമത്തിന്റെയും സാക്ഷ്യപത്രമായിട്ടാണ് ഈ സമാഹാരം അടയാളപ്പെടുത്തുന്നത്. സഭാ ഐക്യപ്രസ്ഥാനങ്ങളുടെ സമഗ്രമായ വളർച്ചയെ മാനവികതയുടെ ഐക്യമായി വിളംബരം ചെയ്യുന്ന സവിശേഷമായ ചിന്തകൾക്കുള്ള അംഗീകാരം കൂടിയാണ് ഈ പുസ്തകം.

ബിഷപ് ഡോ.മാർ ഫിലക്സിനോസിനോടൊപ്പം പ്രവർത്തിച്ചവരും, അകലെ നിന്ന് വീക്ഷിച്ചവരുമായവരുടെ ഓർമ്മകളും, പ്രതികരണങ്ങളും, സമർപ്പണവും അടങ്ങുന്ന വ്യക്തി വൈഭവത്തിന്റെ അനുഭവ കുറിപ്പുകളാണ് പുസ്തകത്തിന്റെ ഒന്നാം ഭാഗം. സഭാഐക്യ തീർത്ഥയാത്രയുടെ രൂപാന്തരീകരണത്തിലൂടെ സാധ്യമാകുന്ന ദൈവരാജ്യ മൂല്യങ്ങളുടെ പുനഃസ്ഥാപനത്തെക്കുറിച്ച് ആഴമായി പഠനം നടത്തുന്ന ദൈവ ശാസ്ത്രജ്ഞൻമാരുടെയും, സഭാഐക്യപ്രസ്ഥാനങ്ങളിലെ അഗ്രഗണ്യരായ നേതാക്കളുടെ കാഴ്ചപ്പാടുകളും ആശയങ്ങളും പങ്കുവെക്കുന്നതാണ് രണ്ടാം ഭാഗം.

ഭദ്രാസന സെക്രട്ടറിയും, ബിഷപ് സെക്രട്ടറിയും, ചിന്തകനും, വാഗ്മിയും ആയ റവ.മനോജ് ഇടിക്കുള, യൂണിവേഴ്‌സിറ്റി ഓഫ് ലണ്ടനിലെ പ്രൊഫസറും, റീനൽ ആൻഡ് ട്രാൻസ്‌പ്ലാന്റഷൻ ഇമ്മ്യൂണോളജി റീസേർച്ച് സെന്ററിന്റെ ഡയറക്ടറും, അനേക മെഡിക്കൽ സയന്റിഫിക് ജേർണലുകളുടെ രചയിതാവും ആയ ഡോ.സാക് വർഗീസ്, ടെക്‌സാസിലെ പ്രമുഖ അറ്റേർണിയായ ലാൽ വർഗീസ് എന്നിവരാണ് പുസ്തകത്തിന്റെ എഡിറ്റേർസ് ആയി പ്രവർത്തിച്ചത്.05

Share This:

Comments

comments